رحله البحث عن فستان فرحك جدا محيره كان عندي شعور اني مني عارفه مني فين ابدا مره مزعجني ف بدات ابحث واصنف المحلات على حسب الشوارع عشان تسهل عليا عمليه البحث
خلال عمليه البحث حيكون حولك ١٠٠٠٠٠٠ فستان انا ف جاني شعور الخوف كيف انا حختار فستاني المناسب وكيف اتاكد انو هادا هوا اللي ابغاه
ف كنت اجرب واجرب واجرب ٫ تخيلو كل الاماكن اللي كتبتها تحت زرتها وجربت فيها مالايقل عن ٥ فساتين
ف الاخير لمن جربت فستاني ٫ جاني شعور انو هادا هوا جاتني مشاعر بكا مع ضحك مع خوف كلو مع بعض ومامتك كمان ممكن تبكي مع الفستان الصحيح
يعني حتكون في مشاعر كثير وقتها حتتاكدي انو دا فستانك
وابدا ابدا لا تتمسكي ب موديل او قصه محدده ٫ جربي كل الخيارات المتاحه لانو ف فساتين كانت اسرتني ف الصور بس لمن جربتها طلعت مهي مناسبه ليا ومعطيتني عمر اكبر من عمري
اللي بنشوفو ف الصور ماحيطلع ف علينا زي الصور
شوفو الفيديو دا صح طويل شويه بس ابغاكم تعيشو معايا الاحاسيس اللي بقولكم عليها كنت زمان احسبهم مشاعرهم رقيقه بزياده بس ف الاخير اكتشفت انو من جد المشاعر دي موجوده :)
- العروسه الاولى ( كانديس ) شافت صوره فستان وسافرت بس عشان تجربو ف الاخير اخدت واحد ثاني لانو طلع احلى عليها
- العروسه الثانيه ( باربرا ) الفستان الاول عجب امها وبكيت والثاني عجبها وماعجب امها والثالث عجبهم الاثنين وشوفو رده فعلهم كيف كانت
نجي للمحلات ٫ حكتب اللي زرتها ف مكه و جده مع حساباتهم ف الانستقرام عشان يسهل الوصول لهم واغلب المحلات فيها فساتين عرايس و فساتين سهره
جده
شارع التحليه
- pronovias
- روشانا مول ( في عده اماكن لتفصيل فساتين افراح ٫ حسب ماقلي الرجال انو ب امكانهم تفصيل اغلب الفساتين المتداوله ف السوشيال ميديا زي انستقرام وغيرو )
- ديميتريوس
- رهيد
طريق الملك
- احمدالبدري
- رهيد
الروضه
الزاهر
- pronovias ف سوق الضيافه
الحمراء
- بوتيك خطوط البنفسج
الرصيفه
- RN بوتيك
هادي المحلات اللي زرتها الفتره الماضيه بس راح يكون البوست متجدد ان شاء الله كل ماازور محل فساتين سهره او عرايس راح اضيفو هنا واذا عندكم فكره عن اماكن اضافيه قولولي عشان نساعد العرايس الحائرات اللي زي حالتي اول مابدات بس الحمدلله تمت مهمه الفستان ب نجاح
0 التعليقات:
إرسال تعليق