الأنفيرجن ميثود ايش هيا ؟
هيا طريقه تساعد على زياده تدفق الدم لفروه الرأس بحيث يتغذا الشعر ويزيد طولو
انا شوفت فيديوهات كثيره عن الطريقه بس للامانه مااتشجعت اعملها من زمان لانو المفروض استخدم زيت وانا شخصيا اكره الزيوت 😔
فقبل حوالي الاسبوعين في بلوقر عربيه كتبت عن الموضوع وانا شعري مره مضايقني تساقطو وبهتانو والعيد جي قولت يلا خليني اجرب وكانت تجربتي كالتالي
الأدوات اللي استخدمتها
١.زيت لوز من المعصرة " احسو اخف الزيوت ريحه " بس ممكن تستخدمي اي زيت
٢. فواحه
٣.مشط
٤.قطن
٥. تي شيرت لقياس طول الشعر
الطريقه : كنت اقسم شعري بالطول بعد كدا أحط
كميه قليله من الزيت ف الفواحه(عشان ابا الزيت يكون دافئ ولمن يخلص أحط كميه تانيه اما لو حطيت كميه كبيره الزيت حيصير حار جدا على الفروه )
بعد كدا أشيل الزيت بالقطنه و اعمل مساج بالزيت لفروه راسي لحد مااخلص بعدها اعمل مساج لفروه راسي بيدي لمده دقيقه
تقريبا الموضوع دا كلو ياخد من ٣-٤ دقايق
ملاحظه : ناس كتير جربو انهم يخلو الزيت دافئ بعده طرق بس كلها فشلت لانو الزيت يبرد بسرعه ف انا قولت خليني اعملها بالفواحه لأَنِّي قبل كدا عملت حمام زيت ف صالون واستخدمو الفواحه لتدفئه الزيت وهيا الطريقه الأنجح 👌🏾
بعد كدا نجي لمربط الفرس اللي هيا الطريقه التشقلبيه :
عندك خيارات انك تتخذي أيا من الوضعيات الموجوده ف الصوره وانا اخترت اللي بالبالونه عملتها ٥ ايام واليومين الاخيرة كنت انسدح ع السرير واكتافي تكون على طرف السرير وراسي ف ألهوا بحيث اني اقدر اسيبو ينزل على تحت ( زي لما كنّا نعمل واحنا صغار 😆) وتستمر الوضعية دي ٣-٤ دقايق
بعد كدا انتي مخيره تغسلي شعرك يوميا او بعد يومين انا كنت اغسل شعري يوم بعد يوم لانو ماينفع الزيت يقعد ف الشعر اكثر من يومين عشان الزيت حيقفل مسام الشعر
قد ايش المفروض نعمل الطريقه دي ؟
لمده ٧ ايام متتالية ف الشهر وماينفع تكرريها اكثر من مره ف الشهر فروه الرأس حتتعود وحتعطي نتايج اقل
ايش النتيجه اللي حصلت عليها؟
اول حاجه وأكثر شي حبيتو لمعه شعري وشكلو اللي صار صحي جدا انا من زمان ماشوفت شعري بالشكل دا
تاني حاجه فعلا زاد طولو إنش زياده
وتالت حاجه لاحظتها انو رموشي زاد طولها ✨✨✨
حقيقي النتايج ابهرتني مع اني ابدا مااتوقعت 💗💗💗 وان شاء الله حعيدها شهريا
دي بعض الصور لنتايج التجربه وإذا تبو تشوفو نتايج وتجارب أكثر ادخلو اليوتيوب واكتبو inversion method وشوفو الفيديوز
