Salon Malda

 تدوينتي اليوم حتكون عن رائي ف صالون ملدا 💜

طبعا ماشاء الله الصالون صار أشهر من نار على علم ف المكياج اغلب الارتيسات ماشاء الله يدهم تتلف ف حرير من جمال ونظافه مكياجهم ✨

ف انا زرت الصالون اول مره للحجز ، حجزت قبل شبكتي بحوالي شهر ونص الى شهرين 

عندهم مجموعه بكيجات بس انا اخترت بكيج الخطوبة وفيلو الخدمات التاليه 👇🏾

وقت الحجز دفعت عربون 1000 غير مسترجع ( ممكن تغيري الموعد )  

يوم الشبكه : 

رحت الصالون الساعه ١ الظهر رقمي كان ٤ وبدات اعمل الخدمات ( هوا المفروض اعملها قبل بيوم ) بس بما انها أشياء بسيطه خليتها نفس اليوم 

1.بدكير + برافين 

كان عادي جداً ماهو افضل برافين عملتو ف حياتي والعاملات مشغولين ف يعملو بسرعه ف ماحبيتو كثير

بعد كدا عملت تركيب اضافر واخترت اللون اللي ابغاه 

2.تنظيف الحواجب 

 دخلت عند العاملة  ف كانت تتكلم بالجوال ( وبالنسبه ليا دي التصرفات غير مقبوله لانها تكون ماهي مركزه تماما ف اللي بتعملو ) ف قبل لا تبدأ قولتلها لا تخلي حواجبي نحيفه 

وسلمتها نفسي , وبدات تشتغل لمن خلصت طالعت ف المرايه ، وما احكيكلم عن الحواجب 

الحاجبين مالهم رسمه معينه ، مافي تفاصيل للحاجب أبدا كانو دجاجه مشيت على حاجبي أبدا شكلها مو مقبول ، 

ف قولتلهاعلى ملاحظاتي ف بدات تعدل ف حواجبي صارت نحيفه و تخرب زياده ف قولتلها توقف ، وخرجت ✋🏾

3. المكياج 

ف غرفه المكياج بدات اعمل مكياج الجسم وحقيقي حبيت ماشاء الله يعملولك هوا ب امااانه ( الرقبه ، الصدر ، الظهر ) 

اخترت لمكياجي زهره الصالح ، طلعت عندها ووريتها فكره فستاني ولونو وسلمتها وجهي 😀

وهيا تشتغل كل مين يجي يطالع فيا يبتسم ويروح وقتها حقيقي مره اتحمسسسست أبغاها تخلص عشان اشوف 

المهم لمن خلصت 😭✨✨✨ حبيت المكياج مره ماشاء الله  ، دحين وانا اكتب اتذكرت اللحظه دي حسّيت حبكي 💕💕💕

المكياج كان جديد عليا بس جمييل ماشاء الله ، يعني اتعب وأقول الله يسعدها مكياجها نظيييف وماايغير ملامح الوجه يبرز جمال ونضاره الوجه 

4. التسريحه 

عملت عند خديجه ، هيا تعمل ل اغلب العرائس جداً لطيفه وتعملك اللي تبغيه ،

انا عملت شعري ويفي ف ماعندي فكره شامله عن التساريح 

الخلاصه : 📋

1. اذا انتي عروسه ماانصحك تاخدي بكيج فيلو خدمات عنايه ، لانو للاسف عندهم مهي بالشكل المطلوب 

2. مكياجهم جدا جميل ونظيف لاتتردي أبداً ف انك تزوريهم 

3. اذا كنتي عروسه ومعاكي مرافقات انك تحجزي من بدري ( قبل مناسبتك ب ٣ أشهر على الأقل ) 

4. حاولي انك تروحي بدري عشان تطلعي بدري انتي واللي معاكي 

5. في حاجه ماحبيتها ، انو العرائس مالهم مكان مخصص بيهم ، يعني عادي تعملي المكياج مع الناس و التسريحه مكان نوعا ما منفصل عن الناس ، يعني لو كانو في أهل زوجك ولا معازيم من الفرح ، كدا تكون راحت طلتك 😹✋🏾

وبس الحمدلله ..

المكياج ف التصوير طلع جدا جميل ، وكنت راضيه عن شكلي تمام الرضا الحمدلله ✨💗 واتمنى انو خدمات العنايه اللي عندهم تتحسن عشان يصير صالون متكااامل 👌🏾

عنوانهم : 

الخالديه - شارع عبدالله ابا الخيل 

حسابهم ف انستقرام 👇🏾

شوفو حسابهم ف انستقرام حيساعدكم أنكم تقررو تبغو تعملو عند مين من الارتيسات ✔️